Dechreuodd ei ail gyfnod fel prif hyfforddwr ym mis Rhagfyr 2022 yn dilyn ymadawiad Wayne Pivac.
Roedd yn etifeddu tîm oedd ond wedi ennill tair o’r 12 gêm o dan Pivac, gan gynnwys colli i’r Eidal a Georgia.
Wrth i nifer o chwaraewyr profiadol oedd wedi chwarae rhan flaenllaw yn ystod ei gyfnod cyntaf wrth y llyw ymddeol, roedd angen iddo droi at y genhedlaeth nesaf.
Ond er gwaethaf perfformiad calonogol yng Nghwpan Rygbi’r Byd 2023, doedd Gatland methu ail-greu’r llwyddiant a welwyd yn ystod ei gyfnod cyntaf.
O’r 26 gêm brawf y mae Cymru wedi eu chwarae yn ystod ail gyfnod Gatland, mae Cymru wedi colli 20 ac wedi ennill chwech o’r gemau hynny.
Mae’r rhediad presennol o 14 colled o’r bron yn cynnwys dwy gêm yn erbyn yr Eidal a gêm gartref yn erbyn Fiji, ac mae Cymru wedi disgyn i’r 12fed safle yn netholion y byd.
Wrth edrych ar record Gatland fel prif hyfforddwr Cymru yn ei gyfanrwydd, mae wedi bod wrth y llyw ar gyfer 151 o gemau – sy’n cynnwys 76 buddugoliaeth, 73 colled a dwy gêm gyfartal.
