Mae cwest wedi clywed bod merch un oed wedi marw ar ôl cael ei tharo gan gerbyd ar faes gwersylla ger Caernarfon.
Roedd Mabel Elizabeth Baldini yn dod o ardal Winsford yn Sir Caer.
Cafodd yr heddlu eu galw i’r digwyddiad yng ngwersyll Bryn Gloch ym Metws Garmon tua 10:20 ddydd Llun, yn dilyn adroddiadau fod plentyn ifanc wedi cael ei tharo gan gerbyd.
Clywodd y gwrandawiad fore Gwener iddi gael ei chludo i Ysbyty Alder Hey yn Lerpwl gan yr Ambiwlans Awyr.
Dywedodd y crwner i’r ferch farw yn fuan ar ôl cyrraedd yr ysbyty, a nodwyd mai anaf difrifol i’w phen oedd achos ei marwolaeth.
Wrth agor y cwest fe wnaeth uwch-grwner gogledd orllewin Cymru, Kate Robertson estyn ei chydymdeimlad i deulu a ffrindiau’r plentyn.
Cafodd y cwest ei ohirio wrth i’r ymchwiliad i’r digwyddiad barhau.
